උපායමාර්ගික සහ ප්‍රතිපත්තිමය ප්‍රකාශන

'NAVSTRAT-2030' උපායමාර්ගික සැලැස්ම එහි අරමුණ, විෂය පථය සහ කාල රාමුව අනුව ඉතා වැදගත් වේ. උපායමාර්ගික පරිසරය, නැගී එන දේශීය හා ගෝලීය යථාර්ථයන් මෙන්ම දිගුකාලීන, කෙටි කාලීන, ප්‍රධාන හා සුළු, අභ්‍යන්තර හා බාහිර තර්ජන පිළිබඳ නිසි අවබෝධයකින් යුතුව ජාතික අවශ්‍යතා සාක්ෂාත් කර ගැනීම සඳහා ශ්‍රී ලංකා නාවික හමුදාව විසින් සකස් කරන ලද ඉදිරි දැක්ම මෙයයි. ශ්‍රී ලංකා නාවික හමුදාව සහ ශ්‍රී ලංකා වෙරළාරක්ෂක බලකාය සඳහා යෝජිත මෙම මාර්ග සිතියම, අවිනිශ්චිත ගෝලීය පරිසරයක් සහ සංකීර්ණතා මධ්‍යයේ අපගේ පුරවැසියන්ගේ ආරක්ෂාව තහවුරු කිරීමටත්, භූමියේ අඛණ්ඩතාව සහ ස්වෛරීභාවය සුරැකීමටත් ඇති දැඩි කැපවීම විදහා දක්වයි. එමෙන්ම කලාපයේ සහ ඉන් ඔබ්බෙහි සැමට ප්‍රතිලාභ සැලසෙන පරිදි නාවික ගමනාගමනයේ නිදහස, වෙළඳාම සහ වාණිජ කටයුතු සුරක්ෂිත කිරීම මෙහි මූලික අවශ්‍යතාවයකි. මෙය 2030 සහ ඉන් ඔබ්බට අපේක්ෂිත මාර්ග සිතියම තුළ, අපගේ නාවික සාමාජික සාමාජිකාවන් මූලික පදනම කරගනිමින් බහුකාර්ය, නම්‍යශීලී සහ කාර්යක්ෂම බලකායක් ප්‍රතිසංවිධානය කිරීම උදෙසා ගත් පියවරකි.

NAVSTRAT - 2030 සැලැස්මෙන් ආභාසය ලබා සකස් කරන ලද ‘ශ්‍රී ලංකාවේ ඒකාබද්ධ සමුද්‍රීය ගුවන් මෙහෙයුම්’ (Joint Maritime Air Operations - JMAO) උපායමාර්ගික සංකල්පය ද්විත්ව අරමුණක් ඉටු කරයි. එනම් ශ්‍රී ලංකා ගුවන් හමුදාව සහ ශ්‍රී ලංකා නාවික හමුදාව අතර ඒකාබද්ධතාවය (Jointness) ඇති කිරීම සහ නාවික යාත්‍රා මත ඇති ගුවන් වත්කම්, විශේෂයෙන් හෙලිකොප්ටර් (rotary wings) සහ නියමුවන් රහිත ගුවන් යානා පද්ධති (unmanned systems) ඒකාබද්ධව ක්‍රියාත්මක කිරීමයි. මෙම ප්‍රවේශයට පාදක වී ඇත්තේ සාම්ප්‍රදායික 'යුධ බලඇණි පෙළගැස්වීමට' (order of battle) වඩා 'ඒකාබද්ධ මෙහෙයුම්වල ප්‍රතිඵලදායීතාවයට' (order of effect) ප්‍රමුඛතාවය දීමේ අවබෝධයයි. ගුවන් හමුදාව සහ නාවික හමුදාව එක්ව මෙම උපායමාර්ගය ක්‍රියාත්මක කිරීම මඟින් අපගේ ආරක්ෂක, ස්ථාවරත්ව සහ ආරක්ෂක ව්‍යුහයේ විශාල පෙරළියක් සිදුවනු ඇත. සමුද්‍රීය පරිසරයට ගුවන් බලය ඒකාබද්ධ කිරීම මඟින් සමුද්‍රීය ආරක්ෂක මෙහෙයුම් (MARSEC), මානුෂීය ආධාර සහ ආපදා සහන මෙහෙයුම් (HA/DR) මෙන්ම සෙවීමේ සහ මුදවා ගැනීමේ මෙහෙයුම් (SAR) වඩාත් කාර්යක්ෂමව සිදු කිරීමට මහෝපකාරී වේ.

ශ්‍රී ලංකා නාවික සඟරාව යනු සමුද්‍රීය, උපායමාර්ගික සහ ගෝලීය කටයුතුවලට අදාළ කරුණු සාකච්ඡා කිරීමට අවස්ථාව සලසන වාර්ෂික ප්‍රකාශනයකි. මෙය නාවික හමුදාවේ සියලුම සේවා නියුක්ත සාමාජිකයින්ට ජාතික හා ගෝලීය වැදගත්කමකින් යුත් මාතෘකා පිළිබඳව ශාස්ත්‍රීය මට්ටමින් අදහස් ඉදිරිපත් කිරීමට, අදහස් ප්‍රකාශ කිරීමට සහ අවබෝධය හුවමාරු කර ගැනීමට ප්‍රබල මාධ්‍යයක් ලෙස ක්‍රියා කරන අතරම ඔවුන්ගේ ලිවීමේ කුසලතා වැඩි දියුණු කිරීමට සහ දැනුමේ ක්ෂිතිජය පුළුල් කිරීමට උපකාරී වේ.

මෙම සඟරාවේ පළ කර ඇති ලිපිවලින් පිළිබිඹු වන්නේ කතුවරුන්ගේ පෞද්ගලික අදහස් පමණක් වන අතර, ඒවා ශ්‍රී ලංකා නාවික හමුදාවේ නිල මතය ලෙස සැලකිය නොහැක.

මෙහි ප්‍රකාශන අයිතිය කර්තෘ මණ්ඩලය සතු වේ. කර්තෘ මණ්ඩලයේ ලිඛිත අනුමැතියකින් තොරව මෙම සඟරාවේ කිසිදු කොටසක් සම්පූර්ණයෙන් හෝ කොටස් වශයෙන් නැවත ප්‍රකාශනය කිරීම තහනම් වේ. මෙම ප්‍රකාශනය ISSN 2448-9409 යටතේ ජාතික පුස්තකාල හා ප්‍රලේඛන සේවා මණ්ඩලයේ (NLDSB) ලියාපදිංචි කර ඇත. සියලුම හිමිකම් ඇවිරිණි.